Алматыда курьер тұрғын үй кешенінің күзетшісін ұрып кетті

Алматыда курьер аулаға рұқсатсыз кіргені үшін ескерту жасаған күзетшіні бетінен екі рет ұрып жіберді, деп хабарлайды Orda.kz.

Оқиға 3 қараша күні «Керемет» ықшамауданында болды. Жәбірленушінің айтуынша, ер адам аулада балалар ойнап жүргеніне қарамастан, кіруге тыйым салынған жолмен кіріп кеткен. Әйел оған ескерту жасап, мопедінің нөмірін суретке түсірмек болған сәтте, курьер оны екі рет бетінен ұрған.

Соққыдан әйелдің қасы жарылып, ол медициналық көмекке жүгінген. Кейін анықталғандай, шабуыл жасаған ер адам жалған құжатпен жұмыс істеген, ал мопед басқа адамның атына тіркелген екен.

Полицияның мәліметінше, күдіктінің жеке басы анықталған. Қазір оны ұстау шаралары жүргізіліп жатыр.

«Бостандық аудандық полиция басқармасы бұл факті бойынша қылмыстық кодексінің 108-бабы “Денсаулыққа қасақана жеңіл зиян келтіру” бойынша сотқа дейінгі тергеуді бастады. Кінәлі адам заң аясында жауапқа тартылады», деп мәлімдеді полиция.

Айта кетейік, бүгін Тоқаев Дональд Трамппен келіссөз жүргізу үшін Вашингтонға аттанды.