Алматыда коронавирустың британдық және Оңтүстік Африка штамы таралуда

Алматыда коронавирустың британдық және Оңтүстік Африка штамы анықталды. Бұл туралы қаланың бас санитар дәрігері Жандарбек Бекшин мәлімдеді деп хабарлады Orda.kz қала әкімдігіне сілтеме жасап.

— Жаңа штамдар өте тез жұғады. Алдыңғы штаммен салыстырғанда жаңа штамның жұғу деңгейі 70 пайыздан жоғары. Соңғы уақытта қаладағы ауру жұқтырудың өсіп кеткені осыған байланысты, - деді Бекшин.

Қазір Алматы қаласы коронавирус бойынша «қызыл» аймақта. Жыл басынан бері қалада 12 800 адамнан коронавирус анықталған. Бас санитар дәрігердің айтуынша ауру жұқтырған балалар мен жастар көбейіп, осыған байланысты коронавирустың жаңа штамын анықтау жұмыстары жүріп жатыр.

— Былтыр ауырғандардың көбі 1980 жылдан бұрын туғандар болса, биыл – 1990 жылдан бұрын туғандар. Мектепке дейінгі балалар арасында ауырғандар екі есе артты. Мектеп оқушылары арасында ауырғандар үш есеге жетіп қалды. Бұл жаңа штаммның жылдам жұғатынының  белгісі, - деген болатын Бекшин.

Бекшиннің айтуынша, Алматыда британдық штамның пайда болуына Түркия арқылы түрлі елдерден оралған отандастарымыз себеп болуы мүмкін. Өйткені Стамбул әуежайлары «жер шарының оңтүстік бөлігі үшін негізгі хаб» болып тұр.

25 наурыз күнгі мәлімет бойынша, қаладағы 12 550 адамға коронавирусқа қарсы екпе салынған. Алматы билігі халықты жаппа екпе салу  үшін «Спутник V» вакцинасының ірі партиясын күтіп отыр.