Алматыда колледжге түсу талаптарына өзгеріс енгізілді

21-24 тамыз аралығында колледжге түсу үшін конкурстың бірінші кезеңі өтеді. Колледжге түсу талаптарына өзгеріс енгізілді.

Бұл туралы Orda.kz хабарлады.

Арнайы емтиханды тек педагогикалық, медициналық пен шығармашылық мамандықтарына түсуші талапкерлер ғана тапсырады. Бұл туралы Алматы қаласының білім басқармасы хабарлады.

Жаңа талап бойынша, медициналық мамандыққа түсу үшін психометриялық тестілеуден өту керек.

Ал педагогикалық мамандықтарға түсушілер кәсіби жарамдылықты растау үшін арнайы емтихан тапсырады.

«Сәулет», «Дизайн» мамандықтарына түсу үшін бірінші сурет салудан, кейін композициядан шығармашылық емтихан тапсыру керек.

Ал басқа орта буын мамандарына (технологтар, техниктер, сервис) оқуға түскісі келетіндер арнайы шығармашылық емтихан тапсырмайды. Онда конкурс бейіндік пәндерінің бағаларын саралау арқылы өтеді.

Колледждерге түсуге 9-сынып бітіруші түлекке конкурс 21-24 тамыз аралығында болады. Ал 11-сынып түлектері үшін конкурс 25-28 тамыз аралығында өтеді.

Баға есептеу:

• 9-сынып талапкерлеріне 25 тамызға дейін;
• 11-сынып талапкерлеріне 29 тамызға дейін.