Алматыда кеңес кезеңінен қалған құбыр жарылды

Әлеуметтік желіде Төлебаев көшесінің бойында су құбыры жарылып, ыстық су атқылаған бейнежазба тарады, деп хабарлайды Orda.kz порталы Adyrna-ға сілтеме жасай отырып.

«Алматы жылу желілері» ЖШС Алматының Медеу ауданындағы Төлебаев пен Әйтеке би көшелерінің қиылысына жақын жерде орналасқан ауданда магистральдық жылу құбырында жарылыс болғанын хабарлады. Оқиға сағат 13:40-та болды,  диаметрі 400 миллиметрлік құбыр жарылды. Жарылыс болған жерді бақылауға алып оны «Алматы жылу желілері» ЖШС жедел бригадасы жөндеуде. Апаттың алдын ала себебі 1985 жылдан бері жұмыс істеп келе жатқан құбырдың табиғи тозуы деп танылды. Жылу желісінің істен шыққан бөлігін ауыстыру жұмыстарының қауіпсіздігін қамтамасыз ету үшін Қонаев - Қазыбек би - Панфилов - Әйтеке би көшелерінің маңында орналасқан ғимараттарға ыстық су және жылу беру уақытша тоқтатылды» делінген хабарламада.

Жоспар бойынша 23:00-ге дейін жылу қайта беріледі.