Алматыда келіншектің басына бала емізіп отырғанда оқ тиген

Алматыда жаппай тәртіпсіздік кезінде көлікте бала емізіп отырған келіншектің басына оқ тиген.

Мұндай ақпаратпен журналист Гүлмира Әбіқай бөлісті.

Белгілі болғандай, 5 қаңтар отбасы балаларына дәрі алу үшін көлікпен шыққан.

 «Бүркітбаевтар бір-ақ күнде қара жамылды. 5 қаңтарда қызуы көтеріліп мазасызданған 7 айлық Нұрымға дәрі алуға шыққан отбасы анадан айырылды. 35 жастағы Жанар кішкентайын емізген күйі басына оқ тиіп мерт болды. Азан-қазан жылаған бала, қанға бөккен бөпе, есеңгіреген отағасы. Сол күйі қаладағы қайын әпкесіне барады. Олар түсінбей, абдырап, бірінші кезекте жедел жәрдем шақырған, бірақ олар келмеді. Жарын өздігінен 4-ші ауруханаға апарғанда, «оқ басын тесіп ми ішінде қалды, азаматша сол мезетте-ақ жүріп кеткенін» айтқан деп жазды Гүлмира ханым.

35 жастағы Жанардың жары оқ тиген кезде рөлде болғанын айтты.

«Назарбаев көшесімен төмен түсіп келе жатқанбыз. Оқ дауысы естілмеді. Оқ тиген кезде келіншегімнің қолында балам болған. Бір кезде түтін шыға бастады. Артыма қарасам, әйелім қисайып жатып қалыпты. Оқтан қашып, тағы 50 метр төмен түстім. Көлікті тоқтатып, әйелімнің жарақатын қарасам, басына оқ тиіпті» деді Сұлтан.

Отағасы жарының өліміне қатысты іс көтеріле ме деген ниетте қанға боялған көліктің ішін жумаған.

«Көлікті ашсам, басы езіліп кеткен. Жанында үш баласы еңіреп отыр. Снайперлік оқ емес, автоматтың оғы екен деп ойладық. Баланың киімі қан-қан. Бірнәрсе болды ма деп шешіндірейін десем, әшнәрсе көрінбейді. Жедел жәрдем шақыртып едік, келмеді» дейді марқұм келіншектің туысы.

Енді 35 жастағы Жанардың артында төрт баласы қалды, ең кенжесіне – 7 ай.