Алматыда Қазақстан мен Словения құрамалары арасындағы ойынға арнайы автобустар шығады

13 қазанда Алматыда Қазақстан мен Словения құрамалары арасындағы ойынға тегін экспресс-маршруттар ұйымдастырылып, арнайы автобустар жолға шығады. Сонымен қатар, Орталық стадион арқылы өтетін қалалық маршруттар көбейтіледі, деп хабарлайды Orda.kz.

«Жолаушылар ағынының  артуына байланысты қала тұрғындары мен қонақтарына ыңғайлы болу үшін Орталық стадион арқылы өтетін № 34, 92, 118, 120, 120а, 79, 121 маршруттары күшейтіледі», деп хабарлады Алматы қаласы әкімдігінің баспасөз қызметі.

Сонымен қатар, тегін экспресс маршруттар ұйымдастыру үшін келесі бағыттарға қосымша сегіз автобус бөлінеді:

• «Шұғыла-Сити» тұрғын үй кешені – Орталық стадион»; 

• «Халық Арена аялдамасы – Орталық стадион»;

• «Алатау» театры аялдамасы – Орталық стадион»;

• «Алматы-1» теміржол вокзалы – Орталық стадион»;

Автобустар стадионға қарай 16:00-де, ал қарсы бағытта 20:30-да шығады.

Орталық стадионнан қозғалған кезде автобустар Абай даңғылы мен Сәтбаев көшелерінің ортасындағы Байтұрсынов көшесіндегі тұраққа орналасады. Сондай-ақ, 2GIS қызметінде экспресс-маршрут жинау пункттерінің орындары белгіленетін болады.

Билеті бар азаматтардың жеке басын куәландыратын құжатқа (жеке куәлік, төлқұжат, жүргізуші куәлігі) сәйкестігі тексерілгеннен кейін ғана стадионға кіруге болады.

Алматының Орталық стадионында 13 қазан күні сағат 18:00-де УЕФА Ұлттар лигасының топтық кезеңі аясындағы Қазақстан мен Словения арасындағы ойын өтеді.