Алматыда кәсіпкерлерді бопсалап жүрген «Айшуақ-Жантүгел» ҰҚТ мүшелері ұсталды

Ішкі істер министрлігі ұйымдасқан қылмыстық топтардың ұсталғанын айтты, деп хабарлайды Orda.kz тілшісі.

Ұйымдасқан топтың криминалдық қызметі туралы дәлелдемелерді жинау арқылы қылмыстық топтардың белсенділері мен жетекшілерін қоғамнан оқшаулау жөнінде кешенді шаралар қабылданып жатыр. Жылдың басынан бері қылмыстық топ құру, оны басқару және қатысу жөнінде 15 дерек табылды. Әртүрлі қылмыстар жасағаны үшін қылмыстық топтардың 30-дан астам белсенділері мен жетекшілері ұсталды. 7 ақпанда ҰҚК мен ІІМ қызметкерлі Алматыда «Айшуақ-Жантүгел»  ұйымдасқан қылмыстық тобының мүшелері бар топты ұстады. Жедел-тергеу іс-шараларының нәтижесінде 14 адам ұсталды. 7 атыс және травматикалық қару, 4 граната, 200-ден астам оқ-дәрі, есірткі заты, сондай-ақ, басқа да суық қару табылды. Топ мүшелері өздерін криминалдық қамқорлықтарын кәсіпкерлерге көрсете отырып, оларды бопсалаумен айналысқаны белгілі болды. Олар Алматының теміржол вокзалында және базарларда өздерінің ықпалдарын жүргізген.

«Ұсталған адамдарға қатысты Алматы қаласы ПД тергеу басқармасы бопсалау және бас бостандығынан заңсыз айыру деректері бойынша бірнеше қылмыстық істі тергеуді бастады», - деді ҚР ІІМ ұйымдасқан қылмысқа қарсы күрес департаментінің басқарма бастығы Қуандық Алпыс.

Дәл осы күні полиция күшімен Ақмола облысы, Степногорск қаласында осыған ұқсас қылмыстық топ ұсталды. Жедел жұмыстың нәтижесінде қорқыту және күш көрсету арқылы жергілікті тұрғындарды бопсалаумен айналысқан криминалдық топтардың жолы кесілді.

«Қылмыстық топтың барлық мүшелері ұсталды. Оларды уақытша ұстау изоляторына қамадық. Бұған қатысты Ақмола облысы ПД тергеу басқармасы бопсалау деректері бойынша 6 қылмыстық істі тергеп жатыр. Көрсетілген деректер бойынша өзге мәліметтер тергеу мүддесінде жарияланбайды», - деді Қуандық Алпыс.