Алматыда қалыңдығы 20 сантиметрге дейін қалың қар жауады

Алматыда дүйсенбі күні, 12 ақпанда сағат 09:00-ден 21:00-ге дейін қалыңдығы 20 см-ге дейін қалың қар жауады, бұл –  ақпан айындағы орташа айлық жауын-шашынның шамамен 40%-ы.

Алматы коммуналдық инфрақұрылымды дамыту басқармасының мәліметінше, осыған байланысты қаланың коммуналдық қызметтері толық дайындыққа келтірілді. Көшелер мен жолдардан қар шығару жұмыстары аяқталды. Қысқы кезеңде барлығы 226 мың текше метр қар шығарылған.

«12 ақпан күні таңертең күшейтілген  арнайы техника қар тазалауға шығады деп жоспарланып отыр, қар тазалауға 600-дей техника және 1220 жол жұмыскерлері қатыстырылады. Тротуарларды, жалпы пайдаланылатын орындарды, кіреберістерді тазалау үшін әлеуметтік маңызы бар нысандарға 176 шағын көлемді техника тартылады. Аудан әкімдіктерінде қар тазалау жұмыстарының жүргізілуін бақылау бойынша тәулік бойы кезекшілік ұйымдастырылады» делінген хабарламада.