Алматыда экс-прокурор мен топ-менеджер бойжеткенді зорлағаны үшін сотталды

Банктің экс-прокуроры мен топ-менеджеріне Алматыда зорлау ісі бойынша сот үкімі шықты. Материалдар Бостандық аудандық №2 сотында қаралды.

«Сот К.Әліқұл мен Т.Тлембаевты кінәлі деп тауып, сегіз жылға бас бостандығынан айырды», - деді сот.

Сот жәбірленушіге ортақ 546 838 теңге мөлшерінде келтірілген материалдық шығынды ішінара қанағаттандыру туралы шешім қабылдады. Сондай-ақ, сотталушылар жәбірленушіге үш миллион теңге көлемінде моральдық зиян үшін өтемақы төлеуі керек.

Үкімге 15 күн ішінде шағым жасалуы мүмкін.

Еске салсақ, іс сотқа 2020 жылдың жазында түскен.

2019 жылдың 7 қарашасынан 8 қарашасына қараған түні Алматының Бостандық ауданында зорлау факітісі орын алған.

Бойжеткен танысымен жалғыз қалу үшін пәтерге келген. Алайда, онда күшті алкогольдік ішімдікке бас алдырған бейтаныс адамдар болған. Кенеттен жігіт жанжал шығарып, қызды ұра бастаған. Кейін оған достары қосылды. Екі күдікті жәбірленушіні таңғы алтыға дейін ерекше қатыгездікпен зорлады. Іс сотқа екі бап бойынша жеткізілді. Кейін белгілі болғандай, олардың бірі прокуратураның бұрынғы қызметкері, ал екінші күдікті банктің топ-менеджері болып шықты.