Алматыда IT-мамандықтарына сұраныс артқан

Алматыда бір жыл ішінде шамамен 35 мың адам жұмыспен қамтылды. Бұл туралы Алматы қаласының Жұмыспен қамту орталығының директоры Дилара Иманқұлова хабарлады.

Қазіргі кезде жұмыспен қамтуды және жаппай кәсіпкерлікті дамытудың «Еңбек» мемлекеттік бағдарламасы үш бағытта жүзеге асырылуда.

• Еңбек нарығында сұранысқа ие мамандықтар бойынша қысқа мерзімді кәсіптік оқыту. 2020 жылы 1005 адам 21 мамандық бойынша қысқа мерзімді кәсіптік курстарға жіберілді.
• Жаппай кәсіпкерлікті дамыту, несиелер мен гранттар беру. Бұл салада өткен жылдың қорытындысы бойынша бизнес-идеяларды жүзеге асыруға 1705 мемлекеттік грант және 154 микрокредит берілді.
• Жұмыспен қамтуға және еңбек ұтқырлығына ықпал ету арқылы еңбек нарығын дамыту.

– Бағдарламалар халықты жұмыспен қамтудың белсенді түрлерімен кеңейтуге мүмкіндік береді. Жалпы, 2020 жылға арналған Алматы қаласының Жұмыспен қамту орталығы 34 855 адамды жұмыспен қамтыды, оның 10 958 адам «Жұмыспен қамтудың жол картасы-2020» бағдарламасы бойынша жұмыспен қамтылды. 2021 жылы 20 мыңнан астам адамды жұмыспен қамту жоспарланған, - деді Иманқұлова.

Қолда бар бос жұмыс орындары туралы сұраққа спикер IT-мамандықтарға сұраныстың артып келе жатқанын атап өтті.