Алматыда халықпен тығыз жұмыс істейтін мамандар түгел дерлік екпе алды

Атап айтсақ, учаскелік полицейлердің 94%-ы, медицина қызметкерлерінің 83%-ы және педагогтардың 99%-ы  вакцина алды.

Қалада COVID-19-ға қарсы жаппай вакциналау белсенді түрде жалғасуда. Қала бойынша барлығы 247 104 адам екпе алды. Бүгінгі таңда қала аумағында  214 егу  пункті жұмыс істейді, онда 1282 адамнан тұратын 315 егу бригадасы қызмет көрсетеді. Оған қоса көшпелі мобильді бригадалар да өз жұмысын жалғастыруда.

Республикалық электрондық денсаулық сақтау орталығы Алматы қалалық филиалының директоры Гүлнар Ысқақова жұмыстың ерекшелігін ескере отырып, халықпен өзара іс-қимыл барысында қауіпсіздікті қамтамасыз ету және  адамдардың денсаулығы мен өмірін қорғау мақсатында екпені өз еркімен алатын мақсатты топтар вакцинамен барынша қамтылғанын хабарлады.

Алматы қаласы бойынша басымдық берілген топтарды вакциналау көрсеткіштері:

• медицина қызметкерлерінің — 83,3% ;

• педагогтардың — 99,7%;

• учаскелік полицейлер — 94,4%;

• медициналық-әлеуметтік және жабық балалар мекемелерінің қызметкерлері мен контингенті — 65%;

• ТЖМ, Қорғаныс министрлігі, ІІМ қызметкерлері — 78% екпе алды.

Сонымен қатар,  Ысқақованың айтуынша, алматылықтар коронавирусқа қарсы егу науқанына, әсіресе аға буын өкілдері жауапкершілікпен келуде. Қазірдің өзінде вакцинаны 65 жастан асқан 31 мыңнан астам азамат алды.  Екпе алғандардың арасында 90 жастағы қарттар да бар.

Медицина қызметкерлерінің айтуынша, аға буын өкілдері вакцинаны жеңіл қабылдайды, жанама әсерлер байқалмаған.