Алматыда есірткі саудасымен айналысқан жас жұп ұсталды

Жас жұп мефедронды заңсыз сақтап, сатқан.

Полицейлер мефедронды заңсыз сақтап, сатумен айналысқан 21 жастағы жігіт пен бойжеткенді ұстады. Ерлі-зайыптылар есірткіні тарату үшін Hyundai көлігін пайдаланған.

Жедел деректерге сәйкес, олар Алматы қаласы мен Алматы облысында есірткі жасырған.

Жеке тінту кезінде күдіктілерден жалпы салмағы 41,75 грамм болатын 56 пакет тәркіленді. Жастардың тұрғылықты жерінен полицейлер тағы бір ұнтақты зат салынған сөмке, 100-ге жуық қап және  электронды таразы тапты.

Қылмыстық іс ҚР Қылмыстық кодексінің 297-бабының 3-бөлігі бойынша тергелуде.