Алматыда «Домиллион» сауда орталығы өртенді

Алматыдағы сауда орталықтарының бірінен өрт шықты, деп хабарлайды ORDA Алматы қалалық Төтенше жағдайлар департаментіне сілтей отырып.

Төтенше жағдайлар департаменті өкілдерінің хабарлауынша, өрт таңғы сағат 8:56-ды шыққан. Өрт сөндірушілер «Домиллион» сауда үйінің өртеніп жатқаны туралы хабар түсісімен оқиға орнына асыққан. Олар келгенше  сағат 09:30 болады, бұл кезде  ғимарат қою түтінге оранып, булығып тұрған.

Тексеру барысында газ және түтіннен қорғау қызметі өрттің қоймадан шыққанын анықтады. Ол жерге өрт сөндіруге арналған биік сатылар қойылып, шұғыл әрекеттер басталды. Таңертеңгі сағат 09:46-да 40 метр алқапты қамтыған қызыл жалын ауыздықталды.   

«Сауда орталығындағы  өрт сөндіру себізігісі және түтіннен тазартатын жүйе іске қосылып, өрттің кең жайылуына жол берілмеді», - деді өрт сөндіру қызметі өкілі.

Өрт сөндіру әрекеті жүріп жатқан жерге 24 техника жеткізіліп,  жеке құрам мен қаланың өзара іс-қимыл қызметінің 79 адамы жұмыс істеді.