Алматыда дауыс беруге бірінші болып келгендерге шоколад ұсынылды

Алматыдағы № 243 сайлау учаскесінде дауыс беру таңғы жетіде басталды. Бірінші болып келген сайлаушылар сыйлық алды, деп хабарлайды Orda.kz тілшісі.

Сайлау учаскесіне алғашқылардың қатарында Бөкен Сәрсенбайұлы мен Раушан Рәпиева есімді екі қария келіп дауыс берді.

«Референдумда дауыс беруді парызым деп есептеймін және осы парызды бірден өтеуге тырыстым», - деді Бөкен аға тілшімізге. 

Бақытжан есімді азамат сайлау учаскесіне дауыс беруге екі баласын ертіп келген бар, біреуі үш жастан сәл асқан.

«Мен ұлдарымды бала кезінен осындай дауыс беруге қатысуға үйретемін, өйткені олар біздің мемлекеттің азаматтары болғандықтан елімізде болып жатқан өзгерістерден шет қалмауы керек», - дейді ол.

Сайлау учаскесінде  бақылаушы ретінде «Аманат» партиясы, «Жастар үні» блогы, «Адам және қоғам» қоғамдық бірлестігі және басқа да ұйымдардың өкілдері жұмыс істеуде.