Алматыда дәрігерлер өлім аузында жатқан науқастың картасынан ақша ұрлаған

Алматы тұрғыны Наталья Савельева жұқпалы аурулар ауруханасының медицина қызметкерлерін анасының жансақтау бөлімінде жатқан кезде телефоны мен төлем картасын пайдаланды деп айыптап отыр.

31 арнасының хабарлауынша, 71 жастағы науқастың соңғы сатып алуы әйел қайтыс болған күні жасалған. Наталья Савельеваға марқұм анасының заттарын бергенде, ол телефонның бұғатталғанын және төлем картасының жоқтығын білген.

Кейінірек әйел анасының жасанды тыныс алу аппаратына қосылып тұрғанда, біреу оның картасымен сатып алу ақысын төлеп, оның әлеуметтік желілерінде отырғанын білген. Қарақшылар сегіз күннің ішінде картадағы барлық соманы, яғни 100 мың теңгені жұмсаған.

«22 қарашадан бастап оның картасымен тұрақты түрде транзакциялар жүргізіліп келді. Соңғы операция ол қайтыс болған күні - 30 қарашада жасалды» дейді Наталья Савельева.

Наталья полицияға арыз жазған. Артынша анасы жатқан жансақтау бөлімінің бастығы ұсталған. Ер адам картаны тауып алғанын мойындап, кейін оның иесінің жансақтау бөлімінде жатқанына көз жеткізген. Жәбірленуші тәртіп сақшысының жалғыз әрекет етпегеніне сенімді және ауруханада нақты схема бар деген ойда.

Полицейлер «Ұрлық» бабы бойынша қылмыстық іс қозғалғанын растады.

«Осы қылмысты жасады деген күдікпен 1998 жылы туған азамат ұсталды. Одан айғақ зат - банк картасы тәркіленіп, қылмыстық іс материалдарына тіркелді. Қазіргі уақытта сотқа дейінгі тергеу жүргізілуде» деді Алматы қалалық ІІД ресми өкілі Салтанат Әзірбек.

Денсаулық сақтау басқармасы бұл жағдайға қатысты әзірге түсініктеме берген жоқ. Олар тергеу аяқталғанша күтуді сұрады.