Алматыда былапыт сөз айтқан депутат жазаға тартылды

Алматы мәслихатының депутаты Тимур Елеусізов баяндама оқу кезінде балағат сөзді араластырғаны үшін жауапқа тартылды, деп хабарлайды Orda.kz порталы.

Депутат Тимур Елеусізовтың айтуынша, 22 ақпанда ол полицияға барып, түсініктеме жазған.

Депутат әкімшілік кодекстің "ұсақ бұзақылық" (434) бабы бойынша жауапқа тартылған (20 АЕК – 73 840 теңге көлемінде айыппұл) .

«Ең бастысы, біз бәрімізді қоршап тұрған мәселелер және оларды шешу жолдарын ойлануымыз керек. Қамықпаңыздар, жағдай осындай, әркім өз қорытындысын жасады, сабақ алды», - деді ол. 

Еске сала кетейік, Алматы мәслихаты отырысы кезінде депутат Тимур Елеусізов баяндамадан шатасып, боқтап жіберген болатын. Кейін депутат боғауыз сөзді қолданғаны үшін кешірім сұрады.

Ал 2023 жылы Қазақстанда қоғамдық орындарда былапыт сөз айтқаны үшін жаза күшейген еді.