Алматыда бойжеткен тұрғын үй кешенінің 16-шы қабатынан секіріп кетті

31 қаңтарда Алматыдағы Манхэттен тұрғын үй кешенінің аумағында жасөспірім 16-шы қабаттан секіріп кетті. Бұл туралы ORDA-ға жергілікті тұрғын хабарлады.  

Азамат есімді тұрғын Брусиловский көшесіндегі Манхэттен кешенінің көп қабатты үйлерінің біріндегі суицид фактісі туралы мәлімдеді.

«Жексенбі күні таңғы сағат 10-да Манхэттен тұрғын үй кешенінде жасөспірім қыз 16-шы қабаттан секіріп кетті. Кейінірек күзетшіден сұрастырып, 15-16 жастағы жасөспірім қыз екенін білдім».

Куәгердің айтуынша, қайғылы оқиға болған жерде он шақты полиция көлігі келіп, аумақ қоршауға алынған.

«Қыз ата-анасымен сөзге келіп, үйден кетіп қалған. Ол іздеуде жүрген. Марқұм Бостандық ауданында болған және мұндай қадамға алдын-ала дайындалған, артынан хат жазып кеткен», - дейді Азамат.

Алмалы ауданының РОП-да суицид оқиғасы расталды. Сондай-ақ, бұл факті бойынша қылмыстық іс қозғалғаны хабарланды, алайда олар тергеу құпиясын негізге ала отырып, мәліметтерді жария етуден бас тартты.