Алматыда бір жарым жасар бүлдіршін оңбай таяқ жеген

Алматыдағы Балалар білім беру орталықтарының бірінде бір жарым жасар кішкентай қыз бала оңбай таяқ жеген.  Бұл туралы «НеМолчиKz» қорының негізін қалаушы Дина Таңсәрі мәлімдеді.

Дина Таңсәрінің айтуынша, бүлдіршін денесінде айқын  соққы іздері бар, оған қоса  миы шайқалған.

— Директор мұны істеген басқа бір бала дейді! Оған сену қиын, - деп жазды Дина Таңсәрі  Facebook парақшасында.

Қалалық полиция департаменті жағдайға қатысты түсінік беріп,  істің тергеліп жатқанын хабарлады.

— Аталған факт ҚК-нің 141-бабы «Балалардың өмірі мен денсаулығы қауіпсіздігін қамтамасыз ету жөніндегі міндеттерді тиісінше орындамау»  бойынша сотқа дейінгі  тергеп-тексерудің бірыңғай тізілімінде тіркелді. Істі Жетісу аудандық полиция басқармасы  қарап жатыр. Тергеу аясында тиісті сараптамалық зерттеулер жүргізіледі. Олардың нәтижелері бойынша процестік шешім қабылданады, - деп хабарлады ПД баспасөз қызметі өкілдері.

Балаларға қатысты бұл алғашқы оқиға емес екендігін айта кеткен жөн. Соңғы кездері балалар мекемелерінде жаппай бейнебақылау камераларының орнатылғандығына қарамастан бұндай бассыздықтар тыйылар емес.