Алматыда белгісіз біреулер 50-ге жуық мысықты айдалаға тастап кеткен

Алматы маңында белгісіз біреулер елуге жуық мысықты айдалаға тастап кеткен. Кішкентай марғауларды қала тұрғындары тауып алған.

Бұл туралы Orda.kz хабарлайды.

Тауып алғандардың айтуынша, марғауларды «Алтын орда» базарының маңындағы далаға тастап кеткен. 26 шілдеге қараған түні ер адам оқиға орнынан видео түсіріп, әлеуметтік желілерге таратқан.

Еріктілер мен зоотехниктер оқиға орнына келіп, мысықтарды алып кеткен. Олардың айтуынша, мысықтардың көп бөлігі инфекцияға шалдыққан және халдері мүшкіл.

– Адамның дауысына жүгірген мысықтар ешкімді бей-жай қалдырмады. Қаланың әр түкпірінен әртүрлі топ өкілдері күндізгі сағат екіде бірнеше көлікпен келіп, мысықтарды алуға асықты. Оқиға орнына келгендер таңқалғандарын жасыра алмады. 40 мысықтан әртүрлі инфекция табылды.

Алты мысықта панлюкопения, ал басқаларында ринотрахеит расталды. Үш ауыр жағдайдағы мысық клиникаға жеткізілді. Қалғандарын таңертеңге дейін Эльмира Муллаходжаева паналатты. Басқа баспаналар да көмек көрсетті. Мұнша көп мысықты емдеу, орналастыру және тіпті тамақтандыру үшін көп ақша қажет. Достар, мысықтарды құтқарайық, - дейді еріктілер.