Алматыда белгілі университет қызметкері ірі көлемде ұрлық жасаған

Қазақ ұлттық аграрлық зерттеу университетінің «Саймасай» оқу-тәжірибелік шаруашылығының директоры бюджет қаражатын ұрлау фактісі бойынша қолға түсті, деп хабарлайды Orda.kz. 

Бас прокуратураның мәліметінше, Алматы қаласының прокуратурасы Қазақ ұлттық аграрлық зерттеу университетінің жалған тұқым егу және егу орындарын өңдеу жолымен бюджет қаражатын ұрлау фактісі бойынша сотқа дейінгі тергеп-тексеруді аяқтаған.

Бұған дейін Бас прокуратураның тапсырмасымен университет қызметіне тексеру жүргізілген. Тексеру бойынша 2020 жылы университет жалпы сомасы 43,8 млн теңгеге қант жүгерісі тұқымын, «аммофос» минералды тыңайтқышы мен аммиакты селитрасын сатып алуға мемлекеттік сатып алу туралы 3 шарт жасасқаны анықталған. Бірақ бұл тауарлар іс жүзінде жеткізілмеген. Ал қаражат қолма-қол ақшаға айналдырылған. 

№2 Медеу аудандық соты үкімімен университеттің «Саймасай» оқу-тәжірибелік шаруашылығының директоры Қылмыстық кодекстің 189-бабы 4-бөлігінің 2-тармағында көзделген қылмыс жасағаны үшін кінәлі деп танылып, 7 жылға шартты түрде бас бостандығынан айырылды.