Алматыда «Батырларға тағзым» акциясы өтуде

Бүгін Алматыда өткен «Батырларға тағзым» акциясына мыңдаған адам қатысты.

Халық Алматыдағы Орталық демалыс саябағының кіре берісінде жиналды. Шерудің басталуы 9:30-ға жоспарланғанымен, адамдар таңғы 8-ден  келе бастады.

Алматылықтар шерудің басталуын күтіп тұрғанда, оларға оркестр ойнап, еріктілер  қазақы нақышпен өрнектелген  жеңіс ленталарын тарата бастады.

Сағат 9:30-да «Батырларға тағзым» шеруі басталды. Полицияның патрульдік көлігі колоннаның алдында жүріп отырды. Шеруді үрмелі аспаптар оркестрі бастап, одан кейін Ұлы Отан соғысының ардагерлері мен қатысушылары ілесті. Әрі қарай шеру қатысушылары «Батырларға тағзым» баннерлерін көтеріп өтті.

28 гвардияшы-панфиловшылар саябағында Ұлы Отан соғысының ардагерлері мен қатысушыларына мерекелік дастархан жайылды. Оларға шай, тәттілер, жемістер мен әскери дәстүрлі тағам -  қарақұмық ботқасы берілді.

Шерудің соңғы нүктесі - Даңқ мемориалына келген дамдар гүл шоқтарын қойды. Бұл жерде де жылдағы дәстүр сақталған,  көбінесе қалампыр гүлдері қойылған. Дегенмен  алқызыл раушан гүлдері де аз емес.

Бір сағаттың ішінде саябақ мыңдаған адамға толды. Олар қолдарына екінші дүниежүзілік соғысқа қатысқан туыстарының портреттерін, Қазақстан мен Кеңес Одағының туын ұстап алған. Иосиф Сталиннің, тіпті Лаврентий Берияның портретін әкелгендер де болды. Олармен суретке түскісі келетіндер де табылып жатты.

Саябақтың бірнеше тұсында  жанды өнер нысандары жасалған, олармен де суретке түскісі келетіндер кезек күтіп тұрды.

Бұндай кезде әдеттегідей сауда да қыза түседі  – әрқайсысы 2000 теңгеден қызыл жұлдызшасы бар пилоткалар да сатылып жатты.

Шеру аяқталды, бірақ халық тарамайды. Жаңадан келгендер екінші дүниежүзілік соғыс батырларының рухына тағзым етіп, ескерткіштерге гүл шоқтарын қойып жатыр.