Алматыда «Бақорда»  құрылыс базары өртенді

«Бақорда» аумағында орналасқан құрылыс базарында шамамен 2 мың шаршы метр аумақ өртенді.

Тілсіз жау  кеше түнде Алатау ауданындағы «Бақорда» базарының аумағынан шықты.

 «Аптап ыстық кезіндегі жоғары сәулелену  салдарынан өрттің көршілес ағаш үйінділері мен салынып жатқан ғимаратқа таралу қаупі туындады. Өрт болған жерге дереу жедел штаб ұйымдастырылып, жоғары өнімді оқпандар енгізілді, өрт сөндіру көлігі қатыстырылды, үйінділерді тазалауға Құтқару қызметінің ауыр шынжыр табанды машиналары жұмылдырылды. Өртті сөндіруге 21 техника мен жеке құрамның 64 адамы қатысты»  деп хабарлайды Алматы қаласы Төтенше жағдайлар департаментінің баспасөз қызметі.

Өрт таңғы 4:04-те оқшауланып, таңғы 6:35-те жойылды. Өрт аумағы 2 мың шаршы метрді құрады. Өрт сөндірушілер базар аумағының көп бөлігін – 24 мың шаршы метрден астам аумақты қорғап қалды (базардың жалпы ауданы 26 000 шаршы метрден астам).  Сонымен қатар  «Бақорда» базарында салынып жатқан сауда орталығы ғимаратының аумағына өрттің таралуына жол берілмеді. Құрбандар мен зардап шеккендер жоқ. Өрттің шығу себебі анықталуда.