Алматыда бұзақы «Айка-мажор» адам пышақтады деген күдікпен ұсталды

Алматыда «Айка-мажор» лақап атымен танымал Әйгерім Бақытжанқызы ұсталды. Бұл туралы қалалық полиция бөлімі бастығының тергеу жұмысы жөніндегі орынбасары Рустам Әбдрахманов Facebook-те жазды.

32 жастағы әйелді бірнеше рет бұзақылық жасап, зорлық-зомбылық қолданған, қоғамдық тәртіпті бірнеше рет бұзған деген күдікпен полиция бөліміне қамалды.

«ҚР Қылмыстық кодексінің 293-бабының 3-бөлімінде көзделген қылмысты жасады деп айыпталған 1988 жылы туылған азамат ҚР Қылмыстық іс жүргізу кодексінің 128-бабына сәйкес ұсталып, уақытша ұстау изоляторына орналастырылды. Қазіргі уақытта объективті және жан-жақты тергеуге, сондай-ақ істің мән-жайын зерттеуге бағытталған тергеу шараларының кешені жүргізілуде», - делінген хабарламада.

2020 жылы 5 қыркүйекте Алматыдағы мекемелердің бірінде жанжал шығып, суық қару қолданылған болатын. Нәтижесінде бір бойжеткен бірнеше рет пышақталған. Кейіннен ол бұл туралы әлеуметтік желіде «Айка-мажор» кінәлі екенін жазды.

«Мен біздің кабинкада шақырылмаған Айканы көрдім. Содан кейін ол менің назарымды өзіне аударуға тырысты, маған әр түрлі сұрақтар қойып, мені жанжалға итермеледі. Маған ол ұнамады, кейін шыдамай, маған тиіспесін дедім. Бір-екі секундтан кейін менің арқама пышақ шаншылды. Мен қансырап құладым», - деді жарақат алған алматылық келіншек.

Зорлық-зомбылық фактісін полиция растады. Сонымен қатар әйелдің ұсталғаны туралы хабарланды.