Қазіргі таңда Алматы қаласында 7 адам іздестіріліп жатыр.
Жергілікті полиция департаменті 4 қаңтардан бері қалада 22 адамның жоғалып кеткенін хабарлады. Бұл адамдардың жоғалғаны туралы полицияға ресми түрде хабарланғанын білдіреді.
Бүгінге дейін 15 адам табылса, тағы жетеуі іздестіріліп жатыр.
Ведомствоның мәліметінше, жоғалу фактісі туралы арызды тұрғылықты жері бойынша немесе жоғалған адамды соңғы рет көрген аудандардың ішкі істер бөліміне жазу қажет.
Еске салсақ, кеше 5 қаңтар жұмысқа шығып, қайта оралмаған Дәурен Жайсаңбаев үйіне оралған. Белгілі болғандай, оны полицейлер бүлікке қатысын тексеру үшін бөлімшеге алып кеткен. Осылайша ол бір апта хабарсыз болған.
Ал 6 қаңтар үйінен шығып, із-түссіз кеткен 50 жастағы алматылық Марат Садықов та аман-есен отбасына оралған. Бұған дейін оның бос көлігі табылған.
Бүлік кезінде дүкенге шығып, оралмаған 65 жастағы зейнеткер Исын Мұхаметәлиевтің жансыз денесі табылған. Болжам бойынша, оны шерушілер итеріп, үйінен алыс алып кеткен. Зейнеткердің жүрегі тоқтап қалған. Полицейлер оны арықтан тапқан. Денесінде ешқандай жарақат болмаған.
