Алматыда қаза тапқан 149 адамның басым бөлігі – лаңкестер! – полиция

Орталық коммуникациялар қызметінде өткен брифинг барысында қалалық полиция департаментінің бастығы Қанат Таймерденов Алматыда 149 адам қаза тапқаны туралы мәлімдеді.

Бұл туралы Алматы полиция департаментінің баспасөз қызметі хабарлады.

«Қаза тапқан 149 адамның басым бөлігі лаңкес-содырлар. Белгісіз адамдарды мәйітханадан ұрлап кеткен 41 мәйіт осы статистикаға да кіреді» деді полицияның баспасөз қызметі.

Қазақстанда қаңтар айындағы қайғылы оқиға салдарынан 225 адам қаза тапты, оның 175-і медициналық ұйымдарда қайтыс болды.

Еске салсақ, Алматыға шабуыл жасағандар жараланғандар мен қаза тапқандарды өздерімен бірге алып кетті, сондықтан мәйітханадан 41 мәйітті ұрлап әкетті деген мәлімдеме шықты.

Полиция бастығы қазір қаланың мәйітханаларында қаза тапқан шабуылдаушылардың денелері бар-жоғын нақтылаған жоқ.

Бір күн бұрын Денсаулық сақтау министрлігінің қоғаммен байланыс департаментінің директоры Әсел Артакшинова шабуылшылар ем алғаннан кейін «қарулы адамдармен бірге ауруханалардан кетті, олар тіпті жансақтау бөлімінен де кетіп қалды» деп мәлімдеді.

Таймерденов оқиғалардың хронологиясын қалпына келтіре отырып, 5 қаңтар күні таңертең «бір мезетте түрлі аудандар мен шет аймақтардан» Алматы орталығына «20 мыңдық тобыр кіргенін» мәлімдеді. Оның сөзінше бұзақылар полиция қызметкерлерінің қорғаныс сызықтарын бұзып, Республика алаңына келіп, әкімдікті басып алуға әрекет жасаған.