Алматыда автобус жолдан шығып кетіп 9 адам зардап шекті

Алматыда 16 шілдеде №137 автобус жолдан шығып кетіп, жол апаты болды. 

Бұл жол апатының бейнежазбасы әлеуметтік желілерге тарап кетті.

№137 автобус жолдан шығып, дуалға барып соғылды. Оқиға орнына полиция қызметкерлері келді. Бейнежазбадан жолаушылардың сыртқа шыққанын көреміз. Жолаушының бірі аяқ киімсіз, ақсаңдап жүргені көрінеді. Ал басқа жолаушының сұлап жатқаны байқалады.

Orda.kz Алматы қаласы полиция басқармасына хабарласып оқиғаның мән жайын сұрады. 

«Бұл жол-көлік оқиғасы бүгін сағат 09:15-те Алматының Наурызбай ауданында болды. Әшімов көшесімен келе жатқан жүк көлігінің жүргізушісі Шаляпин бойындағы 137-бағыттағы аялдамада тоқтаған автобусқа келіп соғылды. Инерция салдарынан автобус жолдың шығыс жағына шығып кетіп, жеке үйдің дуалына барып соғылды. Апат салдарынан автобустың 9 жолаушысы зардап шекті.
 Жол апатына қатысты басқа да мән-жайлар анықталып жатыр» деп хабарлады Алматы қалалық полиция департаментінің баспасөз қызметі.