Алматыда әскери нысанды 20 жыл бойы кәсіпкер басқарған

Алты миллиард теңгеден астам мүлік мемлекетке қайтарылды. Бұл туралы Бас әскери прокуратура хабарлады.

Жоғарғы сот бас әскери прокурордың талабы бойынша Қорғаныс министрлігінің құны бес миллиард теңгеден асатын қорғаныс нысанын қайтарды.

Алматы қаласындағы ауданы 16 мың шаршы метрден асатын 10 қоймадан, екі әкімшілік ғимараттан, екі өндірістік цехтан тұратын мүліктік кешен 20 жыл бойы жеке тұлғаның сенімгерлік басқаруында болған.

«Қазіргі уақытта қайта тіркеу рәсімі жүргізілуде, одан кейін нысан қорғаныс қажеттіліктеріне пайдаланылады. Сондай-ақ, әскери қадағалау актілері бойынша 180 млн теңгенің 22 жер телімі қайтарылды», - деп хабарлады Бас әскери прокуратура.

Сондай-ақ, 25 жылдан астам заңсыз иеленуде болған, жалпы құны 400 миллион теңге болатын 200-ден астам қызметтік пәтер мемлекеттік балансқа қойылып, баспанаға мұқтаж әскери қызметкерлерге үлестірілетін болады.