Алматыда аса ірі көлемде есірткі контрабандасы тоқтатылды

Алматы қаласы бойынша ҚМА департаменті қалалық авиациялық көлік прокуратурасының үйлестіруімен аса ірі көлемдегі есірткі заттары контрабандасының жолын кесті.

Бұл туралы Қаржы мониторингі агенттігінің баспасөз қызметі хабарлайды.

Қызметтік-іздестіру итінің көмегімен жедел-іздестіру іс-шараларын жүргізу кезінде АҚШ-тан хат келіп түскеннен кейін Алматы қаласының тұрғыны ұсталды, одан жалпы салмағы 866 грамм «марихуана» есірткі табылып, тәркіленді.

«Пәтерді тінту кезінде ұсталған азаматтан есірткі заттары, 5 электронды таразы, сондай-ақ есірткі заттарын қолдануға және орауға арналған құрылғылар табылып, тәркіленді. Ұсталған азаматтың Telegram мессенджерінде есірткі заттарын сатумен айналысқаны анықталды» делінген хабарламада.

Қазіргі уақытта тергеу жүріп жатыр, бірқатар сараптамалар тағайындалды. Күдіктіге қатысты «қамау» түріндегі бұлтартпау шарасы таңдалды.