Алматыда қарақшылар тобы ұсталды

Алматыда қарақшылар тобы ұсталды, олардың ішінде қыздар да бар. Олар қаладағы тәртіпсіздік кезінде қарақшылықпен айналысқаны анықталды.

Алмалы аудандық полиция басқармасының мәліметінше, қала орталығынан күндіз 21-27 жас аралығындағы бес адам ұсталған, олардың екеуі - қыз.

Сонымен қатар, күдіктілер есірткі таратумен айналысқаны мәлім болды. Ұсталғандардың жалдамалы пәтерінен бөлшек саудаға өткізуге дайындалған синтетикалық есірткі, ұрланған техника бұйымдары табылып, тәркіленді.

– Барлығы қылмыстық іс материалдарына қосылды. Оның ішінде ұнтақ тәрізді зат түрінде 70-тен аса магнит түйіншегі, сондай-ақ, компьютерлер, ноутбуктер, теледидарлар, проекторлар, пернетақталар, екі процессор мен монитор, виртуалды ойындарға арналған дулыға, киімдер, оқ-дәрі табылды, - деп мәлімдеді Алматы комендатурасының өкілі.

Күдіктілер қамауға алынды. Олардың басқа заңсыз әрекеттерге қатысы бар-жоғы тексеріледі.