Алматыда алаяқ жұп 41 адамның сыртынан несие алған

Алматыда алаяқтықпен айналысқан ерлі-зайыптылар бөтен адамдардың құжаттарын пайдаланып 4 миллион теңгеден астам несие алған. Олар екі жыл ішінде төлқұжат арқылы несие рәсімдеп, 41 адамды сан соқтырған.

Бұл туралы  Orda.kz   Алматы қаласы полиция департаментінің баспасөз қызметінің мәліметіне сүйеніп хабарлайды.  

Қолға түскен ер адам 26 жаста, әйелі 27 жаста. Ерлі-зайыптылар Алматыда тіркелген микроқаржы ұйымына қатысты алаяқтық жасады деген күдікпен ұсталды.

2019 жылдан бастап алаяқтар тауар сатып алу үшін ақша аудару сылтауымен интернет-дүкен сатушыларынан олардың ЖСН мен банк картасының деректемелерін алған.

— Сатушылардың төлқұжат мәліметтерін пайдалана отырып, олар МҚҰ сайтында онлайн режимде микрокредит алуға өтінім беріп отырған. Ақшаны алғаннан кейін сатушылармен қайтадан байланысқа шығып, оларға абайсызда ақша аударғанын хабарлап, оларға басқа банк картасына ақшаны қайтаруды сұраған, – деді  Алматы ПД бастығының орынбасары полиция подполковнигі Рустам Әбдірахманов.

41 адамнан төлемдер бойынша кешіктірулер болғаннан кейін МҚҰ-дан полицияға арыз түскен. Барлық «қарыз алушыларды» тапқан полиция олардың қарызды өздері алмағанын анықтады.

Күдіктілерге қатысты тергеу аяқталып,  материалдар сотқа берілді. Олар қамауға алынды.