Алматыда алғашқы күні 300-ден астам адам Pfizer вакцинасын қабылдады

Алматыда COVID-19-ға қарсы Pfizer вакцинасымен егу  басталды. Осы уақытқа дейін 300-ден астам адам Comirnaty Pfizer/BioNTech вакцинасын салдырды.

Вакцина мектеп оқушылары, колледж студенттері, жүкті және бала емізетін аналарға арналған.

Бүгін Премьер-Министрдің орынбасары Ералы Тоғжанов айтқандай жасөспірімдерге тек ата-анасының жазбаша келісімімен ғана Pfizer вакцинасы салынады.

«Бүгін COVID-19 инфекциясының таралуын болдырмау жөніндегі ведомствоаралық комиссия отырысында Ералы Тоғжанов барлық облыстардың басшылығына белгіленген ережелерді қатаң сақтауды және жасөспірімдерді ата-аналарының немесе балалардың заңды өкілдерінің жазбаша келісімімен ғана вакциналауды тапсырды»  деп жазды Ержан Байтанаев Facebook желісінде.

Мемлекет балаларына екпе жасауға дайын емес ата-аналармен түсіндіру жұмыстарын жүргізеді.

11 қарашада Алматыға Катардан Pfizer вакцинасының алғашқы партиясы келді. Жалпы Қазақстан Pfizer вакцинасының 4 миллион дозасын сатып алды. Ол 2 миллион адамға есептелген.

Нұр-Сұлтанда Pfizer вакцинасын егу  15 қарашада басталады. Ол қаланың медициналық ұйымдары мен оқу орындарында жүргізіледі.