Алматыда Аяжан Еділованы өлтіру ісі бойынша сот басталды

Алматыда Аяжан Еділованың өліміне қатысты негізгі сот отырысы басталды.

Іс қылмыстық істер жөніндегі мамандандырылған ауданаралық сотында қаралып жатыр. Сот отырысына төрағалық етуші судья Еркін Майшинов.

Сот 9 қараша күні сағат 10:00-де жабық өтеді.

Бұған дейін Еділованы өлтірді деген күдікті алдын ала тыңдау кезінде алқабилер сотынан бас тартқан.

Еске салсақ, 2021 жылдың 19 наурызында Алматы қаласының тұрғыны Аяжан Еділова жұмыстан шығып, жоғалып кеткен. Бірнеше күннен кейін полиция департаменті қыздың өлі екенін хабарлады. Жедел-іздестіру іс-шараларын жүргізу барысында жоғалған күні бойжеткеннің жаңа танысымен кездесуге бара жатқаны анықталды. Күдікті Түркістан облысының 1993 жылы туған тұрғыны ұсталды.

Қылмыстың жан түршігерлік жай-жапсарын жұртшылыққа марқұмның туыстары айтып берді. Сондай-ақ, олар Аяжан ер адаммен кездесуге барғанын жоққа шығарды.

Белгілі болғандай, 19 жастағы бойжеткенді өлтірген күдікті Шымкент медициналық академиясында фармацевт мамандығы бойынша оқып жүрген. Ол 2012 жылы грантқа оқуға түскен. Бірақ екінші курстан кейін ол оқудан шығарылған. Оның тәртібіне ешкім шағымданбаған.