Алматыда адам өлімімен аяқталған жол апаты: жолаушының жүргізушіге шабуыл жасаған видеосы пайда болды

Кадрда жолаушы мен жүргізушінің ұрысып қалғаны көрінеді. Содан кейін ашуланған ер адам жұдырық жұмсап, қоғамдық көлік тізгініндегі әйелді ұрып жібереді.

Осы уақытта жолаушылардың бірі араша түседі. Бірақ бұзақы әйелдің бетінен бірнеше рет ұрып үлгерді. Осыдан кейін жүргізуші көлікті басқара алмай қалды.

Қақтығысқа не себеп болғанын қазір құқық қорғау органдары анықтап жатыр. Екі нұсқа қарастырылуда: жол жүру ақысына қатысты жанжал және өткізіп алған аялдама болуы мүмкін.

Осы оқиғаның куәгері болған және оқиғаның мән-жайын білетін адам болса, біздің Ордаботқа @Ordakazakhstan_bot хабарласуын сұраймыз.

Оқиға Алматыда 2023 жылдың 22 желтоқсанында сағат 18:15-те болған. Басқарусыз қалған автобус аялдама маңында адамдарды соқты, сонымен қатар төрт көлікпен соқтығысты. Осы оқиға салдарынан үш адам қаза тауып, тағы төрт адам жарақат алып, ауруханаға жатқызылды.