Алматыда 8 жылда бірінші рет жалдамалы пәтерлер арзандады

Алматыда соңғы сегіз жылда алғаш пәтерді жалға алу арзандады, деп хабарлайды Orda.kz порталы DataHub сайтына сілтеме жасап.

Ұлттық статистика бюросының мәліметінше, Алматыда ақпан айында тұрғын үй нарығындағы баға қаңтармен салыстырғанда бірден төмендеген.

Пәтерді жалға алу 2,9 пайызға арзандады. Бастапқы нарықтағы пәтерлерді сатып алу құны 1,4 пайызға, екінші деңгейлі нарықтағы пәтерлер екінші ай қатарынан 0,4 пайызға арзандаған.

Жалпы Қазақстан бойынша жаңа тұрғын үй бағасы +0,4% өскен. Мұндай өзгеріс Алматыдан басқа Қарағанды ​​(-0,3 пайыз) мен Павлодарда (-0,1 пайыз) байқалады.

Қазақстан бойынша пәтерлерді қайта сату 1,7 пайызға өсті. Олардың ішінде Астана қаласында қайта сату бағасы – +5,3 пайызға қымбаттаған.

Елімізде пәтер жалдау ақысы 1,2 пайызға, соның ішінде Семейде 4,4 пайызға арзандаған.