Алматыда 7 см қар жауды: коммуналдық қызметтер күшейтілген режимге көшті

16 ақпанда сағат 07:30-дан бастап Алматыда алдымен жаңбыр жауып, оның арты қарға ұласты. Сағат 12:00-дегі жағдай бойынша қалаға 7 см қар жауды. 

Қар тазалауға 483 арнайы техника мен 1180 жол жұмысшы шықты. 176 құм төсегіштің күшімен көктайғаққа қарсы материалдар себіледі. Сағат 12:00-дегі жағдай бойынша 1120 тонна көктайғаққа қарсы материалдар пайдаланылды. 

"Сағат 12:00-ден бастап жол полициясы патрульдік машиналарының алып жүруімен 11 тізбекті қар тазарту жұмыстары ұйымдастырылды. Тротуарларды қардан тазартуға шағын көлемді 174 техника қатысты. Олар тротуарларды, жалпы пайдалану орындарын және әлеуметтік маңызы бар нысандарға кіреберістерді  қардан тазартып жатыр. Қоғамдық көлік аялдамалары мен жер үсті жаяу жүргіншілер өткелдері қолмен тазартылуда. Аудан әкімдіктерінде жұмыс өндірісін бақылау бойынша тәулік бойы кезекшілік ұйымдастырылды" деп хабарлады қаланың коммуналдық инфрақұрылымды дамыту басқармасы.