Алматыда 52 жастағы әйел автобустан құлап, егіз сәбиді дүниеге әкелді

Алматыдағы Перинатология және балалар кардиохирургиясы орталығында экстракорпоралды ұрықтандыру әдісімен жүкті болған 52 жастағы әйел егіз сәбиді дүниеге әкелді.

Науқас автобустан құлап, ауруханаға жүктілігінің 31-ші аптасында келіп түскен. Босанған әйел ауыр жарақат алмағанымен, денсаулығы нашарлай бастаған. Бас ауруына, ішінің ауруына, қан қысымының көтерілуіне шағымданған.

Ультрадыбыстық зерттеуден кейін дәрігерлер екінші ұрықтың жүрегінде ауытқуларды анықтады. Ал әйелде преэклампсия болған. Бұл ауру салдарынан ананың денсаулығы тез нашарлап, ұрыққа қауіп төндіруі мүмкін. Сондықтан қала тұрғынына шұғыл ота жасалды.

Салмағы 1644 грамм және 990 грамм болатын екі шала туған ұл бала дүниеге келді. Науқас бірнеше күн жансақтау бөліміне жатқызылды, сәбилер балалар жансақтау бөліміне ауыстырылды. 10 күннен кейін анасы мен балалары бөлімшеге ауыстырылды. Бүгінде олардың жағдайы жақсы. Жаңа туған нәрестелер салмақ қосып жатыр, олардың өміріне еш қауіп жоқ.

«Балалар үшін қатты уайымдадым, өйткені олардың біреуі өте әлсіз болды. Осы орталықтың реаниматологтары, неонатологтары және басқа да мамандарының назары мен кәсібилігінің арқасында сәбилерім тез оңалып кетті. 10 күннен кейін жансақтау бөлімінен бөлімшеге ауыстырдық. Қазір балалар салмақ қосып үлгерді, біреуінің салмағы екі келіден асқан, ең кішісі 1600 грамм. Біздің өміріміз үшін күрескен реаниматологтарға, неонатологтарға және барлық медицина қызметкерлеріне рахмет!» деді науқас көзіне жас алып.