Алматыда 18-қабаттан әйел төрт жасар баласымен бірге құлады

11 наурызда таңғы сағат алты шамасында Алматыдағы «Комфорт Сити» тұрғын үй кешенінде 18-қабаттың терезесінен әйел баласымен бірге құлады, деп хабарлайды Orda.kz.

Әйел алған жарақаттарынан оқиға орнында көз жұмды, ал бала ауыр халде ауруханаға жеткізілді. Orda.kz бұл оқиғаға қатысты түсініктеме алу үшін Алматы қалалық полиция департаментіне хабарласты.

«Аталған факті бойынша Бостандық аудандық полиция басқармасы қылмыстық іс қозғады. Оқиғаның себебі мен мән-жайы анықталуда»,  деп мәлімдеді полиция өкілдері.

Көптеген жарақат алған 2021 жылы туған бала жедел медициналық жәрдем бригадасымен  Балалар шұғыл медициналық көмек көрсету орталығына жеткізілді.

Ол реанимация және қарқынды терапия бөліміне (РҚТБ) жатқызылды. Дәрігерлер оның жағдайын өміріне қауіп төндіретіндей аса ауыр  деп бағалап отыр. Қазіргі уақытта ҚР Денсаулық сақтау министрлігінің Диагностика және емдеу хаттамасына сәйкес қажетті ем қабылдап жатыр.