Алматыда 13 адам қаза тапқан хостелге қатысты тергеу аяқталды

Алматыда 2023 жылдың қарашасында Әди Шәріпов көшесінде орналасқан хостелде болған өрттің тергеуі аяқталды. 

Бұл туралы Медеу ауданында өткен тұрғындардың әкіммен кездесуі барысында мегаполис прокуроры хабарлады.

«Айдың соңына дейін іс сотқа жіберіледі, қазір танысу кезеңінде», – деді Серік Қаріпбеков.

Кездесуде тұрғын жалға берілген ғимараттың иесі жазаға тартылмағанын атап өтті. Қала әкімі Ерболат Досаев өрт үшін ғимарат салған адам емес оны хостел қылып жалға берген адам жауапты болу керек екенін айтты.

«Мысалы, сіздің меншігіңізде пәтер бар және оны жалға бергенсіз. Біреу өрт қойса, оған кім жауап береді? Хостелдердің жұмысын кім тексерді? Өкінішке қарай, 2016 жылдан бері бұл қызмет толықтай жойылды. Тек минималды бақылау ғана болды. Қазір студенттерді орналастыру алдында біз қаладағы барлық хостелдерді комиссиялық түрде қоғамдық кеңеспен және басқармалармен бірге тексеріп, тек шектеулі санын ғана ұсындық. Сондықтан жұмыс форматы өзгерді», – деп түсіндірді әкім Ерболат Досаев.

Еске сала кетейік 2023 жылдың 30 қарашасында  Алматыдағы Әди Шәріпов көшесінде орналасқан хостелде өрт шығып, 72 адамның 59-ы өздігінен эвакуацияланды,13 адам қаза тапты.