Алматы тауларында жоғалған шетелдік азаматты іздеу шаралары басталды

Алматы тауларында австралиялықтың жоғалып кету фактісі бойынша іздеу ісі қозғалды.

Бұл туралы Ішкі істер министрлігінің баспасөз қызметі хабарлайды.

«Криминалдық полиция қызметкерлері, учаскелік инспекторлар мен кинологтар арасынан арнайы жедел-тергеу тобы құрылды. Шетелдік азаматты іздеу бойынша барлық полиция бөлімшелеріне бағыт-бағдар берілді. Сонымен қатар, еріктілердің ресурстары барынша пайдаланылады. Қазіргі уақытта қол жетімді ақпаратқа сәйкес, Австралия азаматы 21 мамырда БАО аймағында байқалған. Ер адам ғарыш станциясына қарай бет алған», – деді Алмалы аудандық ішкі істер бөлімінің бастығы Есен Ысқақов.

Іздестіру жұмыстарына тікұшақ экипаждары, республикалық жедел-құтқару жасағының күштері жұмылдырылғаны атап өтілді. Бейне барлауды ұшқышсыз ұшақтар жүргізеді.

Бұған дейін Алматы тауларында құтқарушылар Австралиядан келген турист іздеп жатқаны хабарланған болатын.