Алматы тауларында тізіліп өткен қара көліктер қала тұрғындарын ашуландырды

Желіде Алматы тауларындағы жолдармен жүйткіп бара жатқан қара түсті көліктердің ұзын тізбегінің бейнежазбасы тарап кетті. Бейнежазба авторы бұл көліктердің жаңа әкімді алып бара жатуы мүмкін екенін айтады, деп хабарлайды Orda.kz.

Әлеуметтік желіде Алматы тауларындағы «денсаулық баспалдағы» маңында бірнеше қара автокөліктің тізіліп өткен бейнежазбасы тарап кетті. Кадрларда полиция көліктері мен шағын автобус қара көліктерді бастап бара жатқанын көруге болады.

Бейнежазба Kris_p_astana парақшасында жарияланды. Бұл аймақта қарапайым туристер автокөлікпен жүре алмайды. Тек электромобильдер немесе электротакси рұқсат етілген. Мемлекеттік қызмет көліктері бұл шектеуден босатылған.

Алматылықтар жаңа сайланған әкім Дархан Сатыбалдыны алып бара жатқан болуы мүмкін екенін айтты. Алайда Дархан Сатыбалдының баспасөз хатшысы әлеуметтік желідегі парақшасында олардың әкімге еш қатысы жоқ екенін айтты.

«Алматы әкімі жұмыс сапарларында жол қозғалысын жаппайды, патрульдік машиналарды да ілестірмейді» деп жазды ол.

Әзірге жолды жауып тұрып, тізіліп өткен көліктерде кімнің отырғаны беймәлім.