Алматы тауларында көшкін қаупі бар

Алматы облысының таулы аймақтарында алдағы бес күнде қар көшкіні жүруі мүмкін, сондықтан  ТЖД қызметі  тауға шықпауды сұрайды.

Алматы облысының таулы аймақтарында алдағы бес тәулікте қар көшкіні жүру қаупі сақталады, деп хабарлайды облыстың Төтенше жағдайлар департаментінің (ТЖД) баспасөз қызметі.

«Алматы облысының таулы аймақтарында 24-28 наурыз аралығында қар көшкіні жүру қаупі сақталады»  делінген сәрсенбіде тараған хабарламада.

Құтқарушылар азаматтарды, туристерді және демалушыларды қар көшкінінің ықтималдығына байланысты қар басқан беткейлерге шықпауға, сондай-ақ , таулы аймақтарда барлық қауіпсіздік шаралары мен тәртіпті сақтауға шақырды.

«Алматы облысы аумағында Еңбекшіқазақ, Талғар, Қарасай, Сарқант, Ескелді аудандары мен Текелі қаласында, сондай-ақ,  Іле-Алатау тауларының оңтүстік беткейінде және Жетісу Алатауының солтүстік жотасының бойында орналасқан 109 қар көшкіні қаупі бар аумақтар бар. Негізінен қар көшкіні ауа температурасының жоғарылауынан және жаңбыр мен қар түріндегі жауын-шашынның көп түсуінен болады»  деп түсіндірді ТЖД.