Алматы тауларында бір тәулікте үш қар көшкіні жүрді

10 наурызда Алматы маңындағы тауларда үш рет қар көшкіні жүріп өтті, деп хабарлайды Orda.kz.

«Қазселденқорғау» мамандары Шымбұлақ-Мыңжылқы жолының маңында қар көшкінінің алдын алу жұмыстарын жүргізді. Бақыланатын жарылыс нәтижесінде 60 мың текше метрге жуық қар көшті. Құрбандар мен қираулар болған жоқ. Қар көшкіні жолды жауып тастады, қазір жолдың аталған бөлігі бағыты тазартылып жатыр.

Адамдардың қатысуынсыз тағы бір қар көшкіні Ақбұлақ тау шаңғысы курорты аумағында болды. 300 текше метр қар жыраға түскен. Ешкім зардап шегіп, жарақат алған жоқ. Оқиға орнында «Қазселденқорғау» және Алматы облысы Төтенше жағдайлар қызметінің мамандары жұмыс істеп жатыр. Жағдай бақылауда. 

Бұған дейін Алматыдағы «Шымбұлақ» тау-шаңғы курортында көлемі шамамен 3,5 мың текше метр болатын қар көшкіні жүріп өткен болатын. Оған үш шаңғышының жабдықталған баурайдан тыс жерде шаңғы тебуі себеп болды. Зардап шеккендер жоқ. 11 наурызға дейін қар көшкіні қаупі жоғары деңгейде болғандықтан қала тұрғындары мен қонақтарынан қауіпсіздік шараларын сақтау сұралды.