Алматы тұрғыны үйін тәркілемек болған сот орындаушыларын атып тастады

Алматы қаласы Алатау ауданының тұрғыны үйін босатуды талап етіп келген сот орындаушысы мен екі учаскелік полицейді және жаңа үй иесін аңшы мылтығымен атып өлтірді. Осыдан он жыл бұрын 2011 жылы Игорь Дужнов пен әйелі Анаид Демирчян банктен жылжымайтын мүлігін кепілдікке қойып несие алған. Қарыз уақытында қайтарылмағандықтан банк үйді аукцион арқылы үйдің жаңа иесі Нұрахмет Тұрғановқа сатқан.

Бұл туралы Orda.kz хабарлайды.

Алматы қаласы Ақбұлақ шағын ауданының тұрғыны Игорь Дужнов оқиғаның басты кейіпкері. Кеше сағат 17:00 шамасында үйге меншік құқығы туралы дау бойынша сот шешімін орындау кезінде ол бес адамды атып өлтірді.

– Сот шешімімен танысқаннан кейін, шығарылған тұрғын үйге жүгіріп келіп, аңшылық мылтығынан сот орындаушысына, учаскелік инспекторларға және аулада тұрған басқа адамдарға оқ жаудырды. Бес адам, оның ішінде қызметтік міндеттерін орындау үстінде болған екі полиция қызметкері қаза тапты, – деп хабарлайды Алматы ПД баспасөз қызметі.

Игорь Дужнов – кәсіпкер. Оған «Нано Плюс» ЖШС тіркелген. Жұбайы Анаида Демирчянның атында «Идеал Сервис» ЖШС тұр. Екеуінің ортақ үш баласы бар екендігі және атыс кезінде балалардың үйде болғандығы айтылды.

Оқиға орнына барған Orda.kz журналистері құзырлы органдардың атыс аймағын қоршап қойғанын көрді.

Полиция департаментінің мәліметінше, қылмыстық кодекстің 99-бабы 2-бөлігі «орындау кезінде адамды өлтіру» бойынша қылмыстық іс қозғалды. Енді атқыш 20 жылға дейін немесе өмір бойы бас бостандығынан айрылуы мүмкін.

Алматы полиция департаменті бастығының орынбасары Рустам Әбдірахманов құрықтау арнайы мақсаттағы жауынгерлердің қатысуымен жүргізілгенін хабарлады.

Полиция тарапынан қару қолданылмады, өйткені сол кезде үйде балалар мен әйелдер болған.

Атыстан қаза тапқандар тізімі:

Алатау аудандық ПБ ЖПҚБ учаскелік инспекторы, полиция майоры Дархан Дауылбайұлы Сүлеев, 1982 ж. т;

Алатау аудандық ПБ ЖПҚБ учаскелік инспекторы, полиция капитаны Нұрбол Назарбайұлы Байғазиев, 1988 ж. т;

Жеке сот орындаушы Абенов М;

Жеке кәсіпкер Нұрахмет Тұрғанов және тағы бір адамның дерегі анықталуда.

Қазіргі таңда тергеу жұмыстары жүріп жатыр. Желіде қылмыскердің құрықталған кезінде түсірілген видео пайда болды.