Алматы полициясы «Супермамасита»-ны егжей-тегжейлі тексереді

Алматы полициясы қазақстандық танымал блогер «Супермамасита» лақап атымен танымал Әлия Байтуғаеваны назарға алды, оған  әлеуметтік желі қолданушыларының  шағымы себеп болыпты.

Бұл туралы қалалық полиция департаменті басшысының орынбасары Рустам Абдрахманов өзінің Instagram парақшасында жазды, деп хабарлайды Orda.kz.

Алматы полиция департаменті басшысының орынбасары Рустам Әбдрахмановтың айтуынша, Әлия Байтуғаева өзінің Instagram парақшасы арқылы ақшалай сыйақыға оқыту курстарын ұйымдастырған. Полиция қызметкері аталған курстардың  кей тыңдармандардың көңілінен шыға қоймағанын алға тартады.

Оның айтуынша, қалалық полиция департаментіне шағымдар 23 шілдеден  бастап түсе бастаған.

— Блогер ісінің ауқымы айтарлықтай: бізден көмек сұрап отырғандардың арасында тек Алматы мен Қазақстанның өзге аймақтарының тұрғындары ғана емес, ТМД елдерінің тұрғындары да бар, - деп атап өтті Рустам Әбдрахманов.

 Сонымен қатар Әбдрахманов барлық зардап шегушілердің шағымдары тіркеліп, әрқайсысына егжей-тегжейлі тексеру жүргізілетінін айтты.

— Мемлекеттік кірістер департаменті арналары арқылы біз кәсіпкерліктің заңдылығын анықтаймыз, содан кейін блогердің іс-әрекетіне заң жүзінде баға беріліп, одан әрі Қазақстан республикасы заңнамасына сәйкес шара қолданылады, - деп қорытындылады Алматы полиция департаменті басшысының орынбасары.

 Әлия Байтуғаеваның Instagram парақшасына 6 миллионнан астам қолданушы тіркелген. Ол әлеуметтік желіде «super.mamasita» лақап атымен танымал.