Алматы полициясы күшейтілген кезекшілікке өтті

Алматы полициясы  қызметтің күшейтілген түріне ауыстырылды, деп хабарлайды Orda.kz порталы Polisia.kz сайтына сілтеме жасап.

«Жаңа жылды тойлау кезінде қоғамдық тәртіпті қамтамасыз ету, қылмыстардың, сондай-ақ басқа да заңсыз әрекеттердің дер кезінде алдын алу және жолын кесу мақсатында Алматы қаласының полициясы күшейтілген қызмет түріне ауыстырылды» делінген хабарламада. 

Патрульдік бөлімдер саны ұлғайтылды, қызмет көрсету маршруттары күшейтілді, жаяу патрульдік қызметке ҚР ІІМ Ұлттық ұланның 300 әскери қызметкері тартылды.

Полиция азаматтардың көп жиналатын жерлері мен мәдени-ойын-сауық шараларын өткізу орындарын ерекше бақылауда ұстайтын болады.

Алматыда полицияның біріктірілген жасақтарын гарнизондық жинақтау шарасы өтті.

«Алматы қаласының бас полицейі жоғары нәтиже көрсеткен полиция қызметкерлерін грамоталармен, алғыс хаттармен және төсбелгілермен марапаттады. Сонымен қатар, оқу-жаттығу барысында жауынгерлік бөлім қызметкерлерінің киім-кешектері, көлік құралдарының жағдайы, сондай-ақ, қаладағы құқықтық тәртіп сапасына әсер ететін техникалық құралдар тексерілді»  деп жазды ҚР ІІМ қарасты басылым.