Алматы полициясы Әбдіғаппаровтың әйелін сотқа береді

Алматы Полиция департаментінің бастығы Қанат Таймерденов кәсіпкер Алмас Әбдіғаппаровтың әйелі - Ольга Әбдіғаппароваға қатысты сот ісін дайындап жатқанын айтты.

Бұл туралы Orda.kz хабарлайды.

Ольга Әбдіғаппарова 4,5 миллион доллар бопсалады және рейдерлік жасады деп айыпталды.

- Әлеуметтік желіде Әбдіғаппаровтың әйелі бізді рейдерлік жасады деп айыптады. Бұл факт бойынша біз сотта ар-намыс, абырой мен іскерлік беделді қорғау үшін азаматтық талап-арыз дайындап жатырмыз, - деді Таймерденов.

Сондай-ақ, кәсіпкерге қатысты қылмыстық іс полиция бөлімінде аяқталу сатысында екенін, Әбдіғаппаровтың өзі қазір қамауда екенін айтты.

Естеріңізге сала кетсек, 26 шілдеде 420 миллион теңгені жымқырды деген күдікпен Parmigiano Group басшысы, кәсіпкер Алмас Әбдіғаппаровтың ұсталды.

Белгілі болғандай, қылмыстық іс Есентай Сити маңындағы қымбат вилланы сатумен байланысты. 2021 жылдың наурызында «AV Construction» ЖШС директоры Рауан Бабаев өзінің орынбасары Алмас Әбдіғаппаровқа бір тапсырыс берушіден жылжымайтын мүлікке ақша алуға сенімхат береді. Кәсіпкер 840 миллион теңге алған, алайда компания кассасына 420 миллион теңге ғана түскен. Бұл кезде Әбдіғаппаров 840 миллион емес, 420 миллион бергенін көрсететін жалған түбіртекті пайдаланған.

17 шілдеде Рауан Бабаев Алматы полиция департаментіне арыз берді. Бір аптадан кейін, 24 шілдеде Алмас Әбдіғаппаров ұсталып, уақытша ұстау изоляторына қамалды. Сот кәсіпкерді екі ай мерзімге қамауға алуға санкция берді.