Алматы облыстық полициясының бұрынғы басшысы қаңтардағы тәртіпсіздік кезінде ауылына кетіп қалғаны белгілі болды

Алматы облысының полиция департаментінің экс-басшысы Серік Күдебаев қаңтардағы тәртіпсіздіктер кезінде Талдықорғаннан шығып кеткен.

Бұл туралы Алматы облысының әкімі Қанат Бозымбаев Арманжан Байтасовқа берген сұхбатында айтты.

Қаңтар айындағы қайғылы оқиғаға тоқталған әкім облысты тек әкімдік басқармайтынын айтты. Оның айтуынша, наразылық акциясын ұйымдастырушылардың гибридті тәсілі – халықтың наразылығын пайдалану.

«Нақты алғышарттар болды. Белгілі бір дәрежеде жастар арасында жұмыссыздықтың белең алуы және т.б. Біздің Алматы облысында өз ерекшеліктеріміз бар: оны тек әкімдер, әкімдіктер, құқық қорғау органдары бақылап отырған жоқ. Бейресми жетекшілер де болды. Бақытымызға орай, қазір олар бақылауда емес» деді Бозымбаев.

Облыс әкімі 5 қаңтарда коменданттық режимге көшкенде полиция департаменті бастығы Серік Күдебаев болғанын, ол облыс әкімдігіндегі жағдайды ұстай алмағанын атап өтті.

«Ақырында, біз, азаматтық билік, олармен бетпе-бет келдік. ІІБ бастығын іздеп жүріп, Талдықорған қаласынан 300 шақырым жерден таңертең ғана таптым. Қаскелең іргесіндегі туған ауылына кетіп қалған. Мен: «Неге кетіп қалдың?» десем. Ол: «Басым сынды, аяғым ауырды, отбасымды алып кеттім» деп жауап берді.

Еске салсақ, бұған дейін БАҚ генерал-майор Серік Күдебаевтың ҚР ішкі істер органдары қызметінен босатылғаны туралы ақпарат таратқан болатын. Бұл хабарды Ішкі істер министрлігінің баспасөз қызметі растады.