Алматы облысының жаңа әкімі қол астындағы қызметкерлеріне сөгіс берді

Жақында Алматы облысының әкімі болып тағайындалған Қанат Бозымбаев алғашқы отырысын жол апаты мәселесіне арнады.

Ресми мәлімет бойынша, облыста 1873 жол-көлік оқиғасы тіркелген. Өткен жылмен салыстырғанда адам өлімімен аяқталған жол-көлік оқиғасы 20 пайызға артқан. Алдағы күннің салқынын ескере отырып, жол апаттары мен жолдарды күтіп ұстау мәселесін өңір басшысы басты міндет деп белгіледі.

– Ауа-райының нашарлауына байланысты қазір жол қауіпсіздігін қамтамасыз ету ең маңызды мәселе болып табылады. Нақты шаралар қабылдануы керек, соның нәтижесінде жол-көлік оқиғаларының азаюы қамтамасыз етіледі, - деді Алматы облысының әкімі Қанат Бозымбаев.

Аймақ басшысы жол-көлік оқиғаларының алдын алуға, қыс мезгілінде жолдарды күтіп ұстауға жауапты облыстық полиция мен әкімдіктегі бірқатар басқармалардың жұмысына көңілі толмады. Сондай-ақ Еңбекшіқазақ, Талғар және Қарасай аудандарының әкімдері апаттылық көрсеткіші нашар деп сынға алынды.

Анықталғандай, жол-көлік оқиғалары негізінен Алматы – Көкпек – Көктал – Қорғас, Алматы – Бішкек, Алматы – Талғар тас жолдарында тіркеліп, 100-ден астам қауіпті аумақтар анықталған. Олар қысқа мерзімде строб-шамдар, бейнекамералар, шуға қарсы жолақтар, қосымша жол белгілері, жаяу жүргіншілер өткелдеріне жарықтандыру орнатуды жоспарлап отыр.

Сондай-ақ Талдықорған – Үшарал, Сарыөзек – Көктал және Үшарал – Достық тас жолдары да ең проблемалы бағыт деп аталды. Белгілі болғандай, биыл кейбір аудандарда жол қызметкерлері қар тазалау жұмыстарын кешіктіріп, төтенше жағдай туғызған.

– Жолдардың жай-күйі туралы жедел ақпарат алмасуды ұйымдастырып, бірлескен қадамдық іс-қимыл алгоритмін әзірлеу. Қар тазалайтын арнайы техника мен мұздан тазарту материалдарының стандарттарға сәйкестігін тексеру. Тұрғындар апаттардың азайғанын сезінуі керек, - деді Бозымбаев.

Облыста 9628 шақырым жол қысқы жөндеуге жатады, оның 3 мыңға жуығы республикалық маңызы бар жолдар. Аудандық маңызы бар жолдарды жөндеу мен күтіп ұстауға 2,8 млрд теңге бөлінді.