Алматы облысының үш ауылында үйлердің аулаларын су басты

Алматы облысында жылыну мен қатты жауын-шашынның салдарынан үш елді мекендегі жеке тұрғын үйлердің аулаларын су басты: Ескелді ауданының Ешкөлмес және Алдабергенов ауылдарында, сондай-ақ Көксу ауданының Талапты ауылында, деп хабарлайды Қазақстан Республикасы Төтенше жағдайлар министрлігінің баспасөз қызметі.

Сегізінші ақпанға қараған түні Алматы облысының төтенше жағдайлар департаментіне үш елді мекенінде көшелерді су алып, 40-қа жуық жеке тұрғын үйлердің ауласын су басты деген хабарлама келіп түсті. Алматы облысы Төтенше жағдайлар департаментінің және Ескелді ауданы, Ешкөлмес ауылындағы жергілікті атқарушы органдардың қызметкерлері оқиға орнынан 10 адамды эвакуациялап, мектеп ғимаратына орналастырды. Су мотор сорғысы арқылы шығарылды. Төтенше жағдайлар департаменті базасында жедел штаб орналастырылды.

Қазір ауылдарда суару арық желісін тереңдету, жағалау бөгетін салу және еріген қар суын ағызу жұмыстары жүргізілуде.