Алматы облысының полицейлері тінту кезінде ұрлық жасады деп айыпталды

Алматы облысының полицейлері ұрланған ақшаны өздері қолды етті деп айыпталды.

Мұндай ақпаратпен қарақшылық жасаған күдікті бөлісті. Күдікті ұсталған кезде полицейлер тінту жүргізген. Салдарынан заттай айғақтар – қомақты ақша мен қымбат телефон жоғалып кеткен.

Еуразия бірінші арнасының хабарлауынша, Жанар Мұқышеваның ұлы ірі қарақшылық шабуыл жасады деп айыпталуда.

Жазда Есік қаласында жас жігіт жалға алған көлігін сатпақ болған. Ол сатып алушыдан 10 млн теңге алған.

Күдікті бірден Алматыда ұсталған. Күдікті ұрланған ақшаны сақтаған қонақүйге полицейлерді әкелген. Тінту кезінде полицейлер айыпталушыдан сейфтің кілттерін, нөмірлері мен ұялы телефонын тәркілеген. Кейін ақшаның басым бөлігі жоғалып кеткен.

«Мен ұлымды көре алмай жүрмін. Кездеспегелі біраз ай өтті. Мен ұлымды ақтағым келмейді. Заң бойынша жауап берсін. Бірақ мен бұл ақшаны тапсам, оның жазасы жеңілдейді ғой. Менің ойымша, бұл жерде Еңбекшіқазақ полициясының қызметкерлері кінәлі. Өйткені қамауға алу кезінде олар ғана болған. Баламның ақшаны қайда сақтағанын тек солар ғана білетін. Менде бейне дәлелдер бар» деді күдіктінің анасы Жанар Мұқышева.

Бақылау камераларынан түсірілген кадрларда тінту басталғанға дейін медициналық бетперде киген ер адамның бөлмеге кіргені көрінеді. Ол бөлмеде 15 минуттай болған. Бұл уақытта ұсталған адам мен тәртіп сақшылары қонақүйдің кіреберісінде тұрған.

«Бұл жағдай ақшаны, яғни заттай айғақты белгісіз біреулер ұрлап кеткен деуге негіз береді. Оның үстіне қонақүйдегі смарт-карта мен сейфтің кілттері полиция қызметкерінің қолында болған» дейді адвокат Рүстем Гаитов.

Полиция оқиғаның мән-жайымен бөліспеді. Дегенмен, күдіктінің өтініші бойынша полицейлер тексеріліп жатыр.

Жанар Мұқышеваның ұлы 15 жылға бас бостандығынан айрылуы мүмкін. Алайда, жоғалған ақша табылса, оның жазасы жеңілдеуі мүмкін. Күдіктінің отбасы президентке үндеу дайындап жатыр.